Á laugardaginn göngum við til kosninga og kjósum til sveitarstjórnar.  Margir eru að kjósa í fyrsta skipti og eru óöruggir um hvernig framkvæmdin gengur fyrir sig.  Hér eru leiðbeiningar til þeirra úr lögum um kosninga til sveitarstjórnar:
English below

57. gr.
Þá er kjósandi hefur tekið við kjörseðlinum, sem oddviti afhendir honum, fer kjósandi með hann inn í kjörklefann [þar sem kjósandinn má einn vera] 1) og að borði því er þar stendur. Á borðinu skulu vera ekki færri en tvö venjuleg dökk ritblý er kjörstjórn lætur í té og sér um að jafnan séu nægilega vel ydd.

Þar skal einnig vera spjald jafnstórt kjörseðli með upphleyptum listabókstöfum og blindraletri, með glugga framan við hvern staf og vasa á bakhlið þannig að blindir geti gegnum gluggann sett kross framan við þann lista er þeir gefa atkvæði sitt og á þann hátt kosið í einrúmi og án aðstoðar.
   
58. gr.
Kjósandi greiðir atkvæði við bundnar hlutfallskosningar á þann hátt að hann markar með ritblýi kross á kjörseðilinn fyrir framan bókstaf þess lista sem hann vill kjósa af þeim sem í kjöri eru....
Meira

 

Sveitarstjórn Strandabyggðar vill minna á að starfsmönnum og nefndarfólki sveitarfélagsins er skylt að gæta þagmælsku um þau atriði sem þau verða áskynja eða fá vitneskju um í starfi sínu og leynt skulu fara. Kveðið er á um þetta í sveitarstjórnarlögum og stjórnsýslulögum. Fulltrúar í nefndum á vegum sveitarfélagsins skrifa undir sérstaka trúnaðaryfirlýsingu þar sem þeir staðfesta þetta. Í henni koma fram viðurlög gegn brotum á þessu samkvæmt almennum hegningarlögum.

Nú hefur komið upp sú staða að gögn tengd ráðningu í starf sem enn er í ferli hjá Strandabyggð, þar sem þessi ákvæði eiga tvímælalaust við, hafa farið á flakk. Sveitarstjórn hafði sjálf aðgang að þessum gögnum og einnig aðal- og varamenn einnar af fastanefndum sveitarfélagsins, en þau hafa greinilega einnig borist í hendur óviðkomandi. Sá sem komst yfir gögnin hefur síðan sýnt þann dómgreindarskort að nota þau til að skrifa frá eigin brjósti skammargrein með dylgjum og óhróðri á Facebook síðu sína, um aðila sem spurst hafði fyrir um starfið.

Sveitarstjórn Strandabyggðar harmar mjög þennan trúnaðarbrest og biður viðkomandi innilega afsökunar á honum. Leitað hefur verið ráða hjá lögfræðingum hjá Sambandi íslenskra sveitarfélaga um frekari viðbrögð við málinu. Sveitarstjórn telur jafnframt rétt að minna á, þar sem líður að lokum kjörtímabilsins, að þagnar- og trúnaðarskylda helst þótt látið sé af starfi.

 

Ráðgjafi óskast í 40% starf

Félagsþjónusta Stranda og Reykhólahrepps auglýsir eftir ráðgjafa í 40% framtíðarstarf frá 1. Júní 2022. Næsti yfirmaður er félagsmálastjóri.

Meginverkefni:

• Að vinna að stofnun atvinnuúrræðis fyrir einstaklinga með skerta starfsgetu á félagsþjónustusvæðinu.
• Ráðgjöf í málefnum fatlaðs fólks.
• Ráðgjöf í málefnum aldraðra.
• Yfirumsjón með málefnum flóttamanna.

 

Menntunar og hæfniskröfur

• Háskólamenntun sem nýtist í starfi svo sem iðjuþjálfun, félagsráðgjöf eða þroskaþjálfun.
• Reynsla af sambærilegu starfi er kostur.
• Góð enskukunnátta æskileg.
• Gott vald á íslenskri tungu.
• Frumkvæði, sjálfstæði og nákvæmni í vinnubrögðum.
• Framúrskarandi hæfni í mannlegum samskiptum.
• Góð alhliða tölvukunnátta.
• Hreint sakavottorð skilyrði í samræmi við lög og reglur félagsþjónustunnar.

 

Umsóknarfrestur er til og með 23. maí 2022

Laun eru samkvæmt kjarasamningi samband íslenskra sveitarfélaga og viðkomandi stéttarfélags.

Nánari upplýsingar um starfið veitir Soffía Guðmundsdóttir, félagsmálastjóri Félagsþjónustu Stranda og Reykhólahrepps í síma 451-3510 eða felagsmalastjori@strandabyggd.is.

Umsækjendur eru beðnir um að skila inn umsóknum á tölvupóstfangið felagsmalastjori@strandabyggd.is. Með umsókn þarf að fylgja ferilskrá um fyrri störf og menntun ásamt kynningarbréfi þar sem gerð er grein fyrir ástæðu umsóknar og rökstuðningi fyrir hæfni í starfið.

Nú stendur innritun yfir fyrir nemendur 10. bekkjar í framhaldsskóla og nýlega var bæklingur um skólann sendur á heimili í Strandabyggð og nágrannasveitarfélaga.  Á heimasíðu skólans kemur fram að FNV er vinalegur skóli þar sem gott samband er á milli nemenda og starfsfólks. Einkunnarorð skólans eru vinnusemi, vellíðan og virðing. Við leggjum áherslu á góða þjónustu og stuðning við nemendur og að sem flestir geti fundið nám við hæfi. Hægt er að leggja stund á bóknám, iðnnám, starfsnám og fleira.

Nemendur í dagskóla sækja skólann á Sauðárkróki eða í dreifnámi á Blönduósi, Hvammstanga eða Hólmavík. Nemendur í fjarnámi geta stundað námið hvaðan sem er af landinu eða hvar sem er í heiminum.

Heimavist skólans er vel búin og herbergi eru nýuppgerð. Í mötuneytinu er lögð áhersla á hollan mat.

Nemendafélag skólans, NFNV, stendur fyrir öflugu félagslífi þar sem nemendur fá tækifæri til að rækta hæfileika sína.

• Áfangar í boði
  
• Námsráðgjöf
• Val í INNU - leiðbeiningar
• Viðtalstímar

Við hvetjum fólk sem er áhugasamt um að kynna sér námsleiðir að hafa samband við námsráðgjafa eða Atla umsjónarmann dreifnámsins á Hólmavík.  Ýmsar iðngreinar er hægt að skrá sig í til að fá réttindi og hingað vantar t.d fólk með menntun í ýmsum iðngreinum.

Á fundi sveitarstjórnar Strandabyggðar í gær var lagður fram ársreikningur fyrir 2021 til seinni umræðu og var hann samþykktur. Þar kemur fram að rekstarniðurstaða sveitarfélagsins samkvæmt samanteknum ársreikningi A og B hluta var neikvæð um 39,5 milljónir króna. Í A hluta var rekstrarniðurstaðan neikvæð um 28 milljónir króna en upphafleg fjárhagsáætlun hljóðaði upp á neikvæða niðurstöðu upp á 62,3 milljónir króna. Þá kemur fram að skuldir og skuldbindingar A og B hluta nema samtals 862,5 millj. kr. skv. efnahagsreikningi.

 

Í fundargerð kemur fram að handbært fé frá rekstri í A og B hluta samanlögðum er 36,7 millj. kr. sem er mjög jákvæð breyting og viðsnúningur miðað við síðustu ár, en árið áður var handbært fé frá rekstri neikvætt um 47,6 millj. Þetta hefur áhrif á rekstur sveitarfélagsins sem skilar afgangi til að greiða af lánum og í framkvæmdir. Eigið fé sveitarfélagsins í árslok 2022 nam 226,9 millj. kr. samkvæmt efnahagsreikningi, en eigið fé A hluta nam 326,5 millj. kr.

Fram kemur að helstu ástæður fyrir mun á fjárhagsáætlun fyrir árið 2021, með samþykktum viðaukum, og niðurstöðu ársreikningsins felast í uppreiknuðum lífeyriskuldbindingum og vaxtagjöldum sem eru töluvert hærri en áætlað var. Einnig að gerð hafi verið mistök við samþykkt fjárhagsáætlunar fyrir árið 2021 um áhrif af sölu Veitustofnunar sveitarfélagsins á ljósleiðara sem eru leiðrétt í reikningnum. Ársreikningurinn var samþykktur samhljóða og verður birtur á vef sveitarfélagsins, ásamt Endurskoðunarskýrslu fyrir 2021.

Lesa má fundargerð sveitarstjórnar á vef sveitarfélagsins.